Miðeind ehf.

Með því að nota Málstað samþykkir þú eftirfarandi skilmála:

1. Inngangur

Við, Miðeind ehf., Fiskislóð 31, 101 Reykjavík, veitum þér, með fyrirvara um að þú fylgir þessum notkunarskilmálum (hér nefndir „skilmálar“) og öllum viðeigandi lögum, leyfi til að nálgast og nota vefinn Málstað (hér nefndur „þjónustan“), eins og nánar er lýst í þessum skilmálum.

Málstaður felur í sér eftirfarandi þjónustur Miðeindar:

1. Málfríður — yfirlestrarþjónusta og þjónusta til að umbreyta texta.

2. Hreimur — þjónusta sem breytir tali í texta eða skjátexta.

3. Erlendur — þjónusta sem þýðir texta og skjátexta milli tungumála.

4. Snara — leitarþjónusta fyrir safn rafrænna orðabóka og uppflettirita.

5. Netskrafl — safn orðaleikja.

2. Skráning og lágmarksaldur

Þér ber að veita réttar og fullnægjandi upplýsingar þegar þú skráir þig fyrir aðgangi að þjónustunni.

Þú verður að vera fjárráða og að minnsta kosti 18 ára að aldri til að samþykkja þessa skilmála og nota þjónustuna.

Þú mátt ekki deila aðgangsupplýsingunum þínum eða gera aðganginn þinn aðgengilegan öðrum. Þú berð ábyrgð á allri notkun sem á sér stað með þínum aðgangi. Þú mátt ekki deila aðganginum þínum með neinum öðrum.

3. Persónuvernd

Við notum aðeins persónuupplýsingar sem við söfnum í gegnum notkun þína á þjónustunni á þann hátt sem lýst er í persónuverndarstefnu okkar.

4. Stuðningur við þjónustuna

Ef þú vilt fræðast meira um þjónustuna eða lendir í vandræðum við notkun hennar skaltu skoða stuðningsefni í Hjálparmiðstöðinni okkar.

Ef þú telur að þjónustan sé gölluð, henni sé ranglega lýst eða ef þú vilt hafa samband við okkur af öðrum ástæðum skaltu senda okkur tölvupóst á malstadur@mideind.is.

Ef við þurfum að hafa samband við þig gerum við það í gegnum vefsíðu okkar á https://málstaður.is og/eða með tölvupósti.

5. Gjöld

Með því að stofna frjálsa áskrift að þjónustunni skuldbindur þú þig til að greiða áskriftargjald og notkunargjald, eins og nánar er tilgreint hverju sinni í verðskrá okkar, en hún er birt á síðunni https://málstaður.is/askrift. Áskriftargjald felur í sér grunnaðgang að Málstað og miðast við fjölda notenda í hópnum. Hver notandi sem er í hópnum einhvern hluta áskriftartímabils er talinn með fyrir allt tímabilið, óháð því hvenær á tímabilinu honum var bætt við eða hann fjarlægður. Ekki er miðað við meðalfjölda notenda og notendur eru taldir frá þeim degi sem þeir samþykkja boð í hópinn.

Notkunargjald bætist við fyrir þá þjónustu Málstaðar sem greitt er fyrir eftir notkun, bæði á vef og í allri notkun á API-tengingum. Greitt er fyrir þjónustuna eftir á og miðast gjöld við undangengið áskriftartímabil. Hægt er að greiða með greiðslukorti eða að fá reikning í heimabanka. Rafrænir reikningar hafa 14 daga greiðslufrest.

Þú getur stofnað margar frjálsar áskriftir og stillt eftir þínum þörfum, til dæmis hvað varðar notendur í hópnum, notkunarhámark, greiðanda/greiðslumáta eða annað. Greitt er fyrir hverja áskrift.

Við áskiljum okkur rétt til að breyta gjöldum hvenær sem er en slíkar breytingar taka gildi við mánaðamót. Gjöld sem þegar hafa verið greidd verða ekki endurgreidd af neinum ástæðum.

6. Hugverkaréttindi

Öll hugverkaréttindi tengd þjónustunni, meðal annars höfundarréttur og vörumerki, eru í eigu okkar.

7. Notkunartakmarkanir

Þú mátt ekki nota þjónustuna fyrir neina ólöglega, skaðlega eða misneytandi starfsemi. Til dæmis er þér óheimilt að:

• Nota þjónustuna á hátt sem brýtur gegn, misnotar eða skerðir réttindi annarra (þar með talið hugverkaréttindi).

• Þýða, sameina, aðlaga, breyta eða umbreyta þjónustunni, að öllu leyti eða að hluta, eða láta þjónustuna eða hluta hennar sameinast eða verða hluti af öðrum hugbúnaði eða vefjum, nema um sé að ræða hluta sem gefnir eru út undir opnum leyfum eða að því marki sem nauðsynlegt er til að nota þjónustuna á tækjum eins og leyft er í þessum skilmálum.

• Afkóða, afþýða, búa til afleidd verk eða endurskapa frumkóða eða undirliggjandi þætti þjónustunnar eða aðstoða aðra við að gera það, þar með talið með því að byggja á heild eða hluta þjónustunnar, eða leitast við að gera neitt slíkt nema um sé að ræða hluta sem gefnir eru út undir opnum leyfum.

• Trufla eða raska þjónustunni, þar með talið að sniðganga magntakmarkanir eða hömlur eða fara fram hjá verndarráðstöfunum eða öryggisráðstöfunum sem við beitum fyrir þjónustuna.

• Nota þjónustuna á ólöglegan hátt, í ólöglegum tilgangi eða á nokkurn hátt sem er í ósamræmi við þessa skilmála, eða hegða þér sviksamlega eða með illum ásetningi, til dæmis með því að brjótast inn eða setja inn skaðlegan kóða, svo sem vírusa, trójuhesta eða skaðleg gögn, í þjónustuna eða keyrsluumhverfi hennar.

• Nota þjónustuna á hátt sem gæti skaðað kerfi okkar, gert þau óvirk, ofhlaðið þau, skert þau eða stofnað þeim eða öryggi þeirra í hættu eða truflað aðra notendur.

• Safna upplýsingum eða gögnum frá þjónustunni eða kerfum okkar eða reyna að afkóða sendingar til eða frá netþjónum sem keyra þjónustuna.

Þú mátt aðeins nýta API-tengingu þjónustunnar í tengslum við eigin rekstur eða til innri nota í hugbúnaðarlausnum þínum, nema um annað sé skriflega samið. Til dæmis er þér óheimilt að:

• Endurselja, framselja eða leigja aðgang að API-tengingunni til þriðja aðila.

• Nota API-tenginguna til þess að byggja upp, bjóða upp á eða starfrækja þjónustu sem er sambærileg eða í beinni samkeppni við kjarnavirkni þjónustunnar. Þetta á meðal annars við um að bjóða upp á opið viðmót eða vefsvæði þar sem almenningi eða utanaðkomandi notendum er gefinn kostur á að nýta yfirlestur eða aðra virkni hugbúnaðarins í gegnum millilið.

8. Ábyrgð okkar á tapi eða tjóni sem þú verður fyrir

Takmörkun ábyrgðar: Að því marki sem íslensk lög (og önnur viðeigandi lög) leyfa takmörkum við ábyrgð okkar vegna taps sem þú verður fyrir í tengslum við notkun þjónustunnar við áskriftargjald sem þú hefur greitt síðustu þrjá mánuði frá þeim tíma sem þú gerir kröfu á hendur okkur. Einnig erum við ekki ábyrg fyrir óbeinu tapi, svo sem tapi á hagnaði, tekjum, viðskiptavild, væntum sparnaði eða viðskiptatækifærum.

Takmarkanir á þjónustunni: Þó að við gerum eðlilegar ráðstafanir til að uppfæra upplýsingarnar sem þjónustan veitir gefum við engar yfirlýsingar, ábyrgðir eða tryggingar, hvort sem þær eru beinar eða óbeinar, um að slíkar upplýsingar séu nákvæmar, heildstæðar eða uppfærðar. Ef þjónustan vísar til þriðja aðila eða vöru eða þjónustu þriðja aðila, þýðir það á sama hátt ekki að þriðji aðili sé tengdur þjónustunni eða njóti stuðnings hennar eða að þriðji aðili telji að svo sé. Falli þjónusta niður sem nemur minna en 24 klst. á almanaksmánuði er slíkt ekki afsláttar- eða bótaskylt.

Þér ber að meta niðurstöður sem þjónustan veitir með tilliti til nákvæmni og hæfis fyrir fyrirhugaða notkun þína. Þú mátt ekki nota slíkar niðurstöður varðandi einstakling í tilgangi sem gæti haft lagaleg eða efnisleg áhrif á þann einstakling, svo sem að taka ákvarðanir um lánshæfi, menntun, atvinnu, tryggingar, lögfræðileg málefni, heilbrigðismál eða aðrar mikilvægar ákvarðanir um hann.

Við berum ekki ábyrgð á atburðum utan okkar stjórnar. Við berum ekki ábyrgð á vanefndum eða töfum á að uppfylla skyldur okkar samkvæmt þessum skilmálum ef slíkar vanefndir eða tafir stafa af orsökum sem eru utan eðlilegrar stjórnar okkar, meðal annars vegna náttúruhamfara, stríðs, hryðjuverka, verkfalla, aðgerða stjórnvalda, náttúruhamfara eða truflana á internet- eða fjarskiptaþjónustu. Í slíkum tilvikum verður skyldum okkar frestað á meðan orsök varir. Ef óviðráðanlegt atvik varir lengur en 30 daga getur hvor aðili um sig sagt upp viðkomandi þjónustu með skriflegri tilkynningu til hins aðilans. Slík uppsögn samkvæmt þessu ákvæði hefur ekki áhrif á skyldu þína til að greiða fyrir þjónustu sem þegar hefur verið veitt.

9. Uppsögn

Samningur telst kominn á milli lögaðila sem þú ert fulltrúi fyrir og Miðeindar þegar þú hefur stofnað frjálsa áskrift í Málstað og staðfest hana rafrænt á þeim vettvangi. Aðgangur að þjónustunni er heimilaður þegar frjáls áskrift hefur verið stofnuð.

Við getum að eigin geðþótta bundið enda á rétt þinn til að nota þjónustuna hvenær sem er. Ef við bindum enda á rétt þinn til að nota þjónustuna verðurðu að hætta allri starfsemi sem heimiluð er í þessum skilmálum, þar með talið notkun þinni á þjónustunni.

Þú getur hvenær sem er hætt við greidda áskrift þína. Þú hefur áfram aðgang að þjónustunni þar til í lok áskriftartímabils en þá tekur uppsögnin gildi og krafa um lokagreiðslu er stofnuð. Nema annað sé tilgreint færðu ekki endurgreiðslu eða inneign fyrir daga á milli þess dags sem þú hættir við og síðasta dags áskriftartímabilsins.

Uppsögn frjálsrar áskriftar tekur til hópsins í heild sinni. Stjórnandi hópsins getur afturkallað uppsögnina á hópstjórnborðinu fram að lokum áskriftartímabilsins. Þegar uppsögnin tekur gildi missa allir notendur hópsins aðgang að þjónustunni í gegnum hópinn, en þeir halda eigin aðgangi að Málstað og geta áfram notað hann í einkaham, með ókeypis aðgangi eða eigin áskrift. Orðalistar, meðlimir og notkunarsaga hópsins varðveitist og er aðgengilegt á ný ef áskriftin er endurvirkjuð eða ný áskrift er stofnuð fyrir hópinn.

10. Framsal

Við getum framselt réttindi okkar og skyldur samkvæmt þessum skilmálum til annars lögaðila. Við munum upplýsa þig ef þetta gerist og við munum tryggja að framsalið hafi ekki áhrif á réttindi þín.

Þú mátt aðeins framselja réttindi þín eða skyldur samkvæmt þessum skilmálum til annars aðila ef við samþykkjum það skriflega.

11. Breytingar á skilmálunum eða þjónustunni

Við endurskoðum skilmálana reglulega. Nýjustu útgáfu má sjá á vef Málstaðar hverju sinni, undir vefslóðinni https://málstaður.is/skilmalar.

12. Viðeigandi lög og lögsaga

Um skilmálana gilda íslensk lög. Rísi ágreiningur vegna skilmálanna, sem ekki er unnt að leysa með farsælum hætti milli aðila, skal mál vegna hans rekið fyrir Héraðsdómi Reykjavíkur.