Miðeind ehf. er leiðandi á sviði máltækni- og gervigreindarlausna fyrir íslensku. Tilgangur og markmið okkar er að styðja íslenskt samfélag og styrkja stöðu tungumálsins með framsýnum lausnum í máltækni og gervigreind.
Miðeind gegndi veigamiklu hlutverki í framkvæmd fimm ára máltækniáætlunar stjórnvalda, þar sem áhersla var lögð á uppbyggingu máltækniinnviða. Undir máltækniáætlun unnum við náið með fjölda íslenskra fyrirtækja, stofnana og háskóla að öflun málfanga, uppbyggingu stoðtóla, málrýni og vélþýðingar, svo eitthvað sé nefnt.
Auk innlendra aðila hefur Miðeind átt í samstarfi við erlend tæknifyrirtæki á borð við bandaríska gervigreindarfyrirtækið OpenAI. Samstarf Miðeindar og OpenAI hefur snúist um að koma íslenskunni inn í risamállíkön OpenAI og kortleggja hvernig kenna má stórum mállíkönum lítil tungumál á sem skilvirkastan hátt.
Miðeind er einnig þátttakandi í Evrópusamstarfsverkefni er nefnist TrustLLM. Það lýtur að gerð stórs gervigreindarmállíkans fyrir germönsk tungumál. Verkefnið er unnið í samstarfi 11 fyrirtækja, háskóla og stofnana og er styrkt af Horizon-rannsóknaáætlun Evrópusambandsins.
Meðal innlendra stofnana sem Miðeind hefur átt í samstarfi við undanfarin ár eru Stafrænt Ísland og Þýðingamiðstöð utanríkisráðuneytisins. Við höfum einnig sérsniðið lausnir fyrir fyrirtæki á borð við Íslandsbanka og Veitur.
Hjá Miðeind starfar þéttur og öflugur hópur fólks með fjölbreyttan bakgrunn og brennandi áhuga á máltækni og gervigreind. Þar er saman kominn einn stærsti hópur sérfræðinga á sviði gervigreindar sem fyrirfinnst á landinu öllu og óhætt að segja að fylgst sé náið með allri rannsóknarvinnu og tæknilegri framþróun innan sviðsins.
